تحليل مباراة الأهلى والزمالك - بطولات

أقوي تحليل لمباراة الأهلى والزمالك

شوط أول بعنوان (التحفظ والحرص من المفاجأت)

بدأ الشوط الأول كما توقعت فى منشورى السابق ( عين على المنافس ) بضغط عالى من الزمالك فى أول ربع ساعه أو تلت ساعه عشان يحرموا لاعبى الأهلى من التحضير والتدرج بالكرة من الخلف وبناء الهجمات وذلك تم عن طريق تضييق المساحات  وقولت إن فى إحتماليه إن الزمالك يلعب بأوباما مهاجم وهمى وقولت إن الزمالك هيحاول ياخد المبادرة ويسجل هدف والحمد لله الشناوى كان يقظ جدا فى الفرصه الثلاثية بتاعه شيكابالا وأشرف بن شرقى

الأهلي يمتص حماس المنافس

الأهلى حاول أن يمتص حماس ورغبة لاعبى الزمالك  وحاول رغم ضعط لاعبى الزمالك أن يتدرج بالكرة بعمل باصات كتير من أجل جذب لاعبى الزمالك ومن ثم إرسال الكرات الطوليه لشريف ولكن دون جدوى.

إستعاده الإستحواذ

بعد الثلث ساعه الأولى بدأ الأهلى فى إستعاده الإستحواذ وسنحت للشحات وشريف وقفشة ٣ فرص محققه ولكن كان فى رعونه فى إنهاء الهجمات.

موقف أيمن أشرف

كان فى تحفظ كبير من أيمن أشرف وتعليمات من موسيمانى بعدم  تقدم أيمن عشان يحرم شيكابالا زيزو من الإختراق وده بمسانده طاهر اللى بذل مجهود كبير ولكن دون فاعلية هجومية.

موقف قفشه

قفشه هيتلعب عليه رقابه لصيقه وممكن توصل للخشونه وبرغم تحركات قفشه كثيرا إلا أن الأهلى كان ينقصه الزياده العدديه الهجومية وده كان بسبب التزام السولية بالأدوار الدفاعيه وهى الضغط على ساسى عشان يحرمة من التمرير السليم.

موقف محمد هاني

أيضا محمد هانى كان تقدمه بحساب خوفا من اختراقات بن شرقى وفتوح عشان كده خرج الشوط الأول بهذة الصورة المتوسطه من الفريقين.

موقف الشحات

الشحات لازم يراجع نفسه كتير لانه حتى دفاعيا كنا بنشوف موقف واحد لواحد بين هانى وبن شرقى وهجوميا لازم يكون اقوى وقراره أسرع من كده برغم إنه تكتيكيا بينفذ أوامر موسيمانى بالدخول للعمق هو وطاهر لعمل الكثافه العدديه فى وسط الملعب ولكن واجهه الزمالك بنفس الطريقه بدخول زيزو وشيكابالا للعمق مع ساسى وطارق فحصل خنقه فى وسط الملعب وده خلى الفرص قليله فى الشوط الأول.

شوط ثانى بعنوان ( الأهلى أهدى الزمالك نقطه التعادل)

بداية الشوط الثاني

بدأ الشوط الثانى بضغط من الزمالك كما هو الحال فى الشوط الأول من أجل أخذ  المبادرة وإحراز هدف وده كان عن طريق جبهة زيزو والمثلوثى وإنضمام شيكا للقلب عشان يكون بالمواجهه ويقدر يسدد لكن دفاع الأهلى كان يقظ فى أغلب الكرات العرضية.

الدفع بأول الأوراق

بعد ربع ساعه قرر موسيمانى أن يدفع بأول أوراقه صلاح محسن على حساب الشحات المختفى على أن يستمر فى ترك الإستحواذ للزمالك ويلعب على سرعات صلاح وشريف وكان بمقدور صلاح ان يسجل بع نزوله بدقائق إلا أنه تسرع فى تسديد الكرة وده كانت من المرات القليله اللى ضغط فيها السوليه ضغط عالى وبعد هذه الفرصه وكالعاده يقوم السولية بدور صانع الألعاب ويرسل كورة بالمقاس يضرب بها الدفاع المتقدم لينفرد صلاح وشريف ويسجل صلاح هدف مميز.

تغيير

بعد الهدف قرر موسيمانى يجرى تغييرين نمطيين بنزول مروان بدل شريف ووليد بدل طاهر والتغييرين دول اللى أعطوا الزمالك نقطة التعادل فكان المفروض نزول كهربا مكان شريف وأكرم توفيق مكان طاهر وكان ممكن وليد يبقى تغييرة اخيره على حساب قفشه.

ما ضرورة نزول أكرم وكهربا

ليه كان ضرورى نزول أكرم وكهربا بعد الهدف؟

تأثير التغييرات

لأن الزمالك كان سيتخلى نسبيا عن تحفظه الدفاعى ويبدأ يهاجم ويفتح خطوطه عشان يتعادل وده وضح من تغييرات كارتيرون فهنا كان ضرورى جدا نزول كهربا عشان يكون بجوار صلاح محسن والإتنين بيتميزوا بالسرعات واللعب فى المساحات وأكرم هيكون حائط صد مع ديانج والسولية ويمنعوا انطلاقات ساسى اللى سجل هدف التعادل من المرة الوحيده اللى بعد فيها عنه ديانج والسوليه وجاى من الخلف بدون رقابه.

الأهلي فقد نقطتين

مع الأسف الأهلى فقد نقطتين جديدتين فى مباراة كان ممكن يخرج فيها فائز.

المهم اللي جاي

عموما قدر الله وماشاء فعل والأهلى قادر على حسم الدورى بشرط عدم فقد أى نقاط أخرى فى الدور التانى.

رجاء

أرجو من الجميع عدم نقد اللاعبين ولا الجهاز الفنى فهى مباراة وعدت والفريق داخل على البطوله الأهم بطوله إفريقيا وعلى مواجهة صعبه مع صنداونز أقوى فرق البطولة.

أفريقيا يا اهلي

الفريق داخل على 
أهم مرحلة فى الموسم مرحلة النهايات مباريتين صنداونز لتكملة المشوار الإفريقى ومباراة نهضة بركان فى كأس السوبر الإفريقى ومباراة طلائع الجيش فى كأس السوبر المصرى وباقى مباريات كأس مصر.

كل الدعم

فكل الدعم للجهاز الفنى واللاعبين لحصد الخمس بطولات القادمه والحساب للجميع سيكون فى نهاية الموسم.