عين علي المنافس

👀 عين على المنافس( الزمالك )👀

🔴 مبدأيا المباراة ده بتمثل لكارتيرون عنق زجاجه مع جماهير الزمالك فإن خسر المباراة أو ظهر بأداء سىء لن أقول أنه سوف يرحل ولكن على الأقل سوف ينتهى شهر العسل بينه وبين الجماهير وادارة النادى وتتحول حاله الحب والدعم لحالة عزاء خصوصا بعد خروجه من بطولة إفريقيا وهزيمته من الأهلى فى لقاء الدور الأول ومن هنا تأتى أهمية اللقاء.

الإستحواذ

🔴 الزمالك : بنسبة كبيرة لن يلعب مثلما لعب مباراة الدور الأول فلن يترك الإستحواذ للأهلى ويلعب على المرتدات ولن يكون رد فعل خصوصا بعد الإنتقادات اللازعه التى وجهت لكارتيرون على الأداء قبل النتيجة.

مفاجأة التشكيل

🔴 أعتقد مفيش مفاجئات فى التشكيل فلو عبدالشافى جاهز فسوف يلعب لخبرته وتميزه فى أداء الواجبات الدفاعيه عن فتوح أو عبدالله جمعه وحازم أيضا سوف يلعب على حساب المثلوثى والونش وعلاء ونص الملعب ساسى وطارق يبقى الرباعى الأمامى هو الشغل الشاغل لكارتيرون ولكن فى إتنين حاجزين مكانهم بن شرقى هداف الفريق وشيكابالا اللى سجل هدفين فى أخر مباريتين قمة.

مركز ١٠

🔴 يبقى مركز ١٠ ومركز المهاجم الصريح وهنا المفاضلة بين زيزو واوباما واحداد والجزيرى فلو لعب زيزو فسوف يكون هناك حرية حركه وتبادل مراكز بينه وبين شيكابالا عشان شيكا يقدر يكون بالمواجهه ويقدر يسدد أما لو أوباما لعب مركز ١٠ فسوف يكون شيكابالا طرف يمين لان أوباما مش بيعرف يلعب على الاطراف ووقتها هيكون المهاجم الصريح هو الجزيرى اللى تسبب فى ضربه جزاء فى مباراة القمة السابقة.

التشكيل

🔴 ممكن جدا كارتيرون يلعب بشيكابالا وزيزو وبن شرقى ويحط اوباما مهاجم صريح خصوصا ان اوباما عنده ذكاء فى التحركات وسرقة المدافعين وعنده المهارة الفرديه وبيقدر يلعب ضربات رأس أيضا ولكن أعتقد أن الجزيرى هو مهاجم الزمالك فى المباراة 

🔴 كارتيرون هيفكر فى كل اللعيبه اللى عندها حلول هجوميه وأيضا حاسة تهديفية وهيحاول يخلص المباراة من الشوط الأول.

ضغط في المباراة

🔴 الزمالك هيبدأ المباراة بضغط عالى وتقارب الخطوط على أمل خطف المبادرة وخطف هدف يربك حسابات الأهلى و عشان كمان يحرم الأهلى من ميزة التدرج بالكرة والبناء من الخلف ولكن مش هيضغط بكل خطوطه يعنى مش هيلعب دفاع متقدم وعلى الأقل هينزل طارق كليبرو أمام علاء والونش وهيكون فى تحفظ فى تقدم عبدالشافى لو لعب عشان تحركات الشحات اللى فى المساحه اللى بين عبدالشافى والونش . بعكس حازم المميز هجوميا.

الحالة الدفاعية

🔴 الزمالك أول حاجه هيعملها وهو فى الحالة الدفاعية إنه هيحاول يكتف قفشه ويحرمه من الإستلام والتمرير خصوصا وإن قفشه حاليا هو محور أداء الأهلى فى ظل غياب معلول وجبهته الناريه فأعتقد ممكن جدا يكلف طارق أو أوباما لو لعب او زيزو بأنه دايما يكون قريب جدا من قفشه ومفيش مانع من استخدام الخشونه لإيقاف خطورة قفشه وهيعمل عمق دفاعى عشان يحرم شريف من ميزة الإنطلاق فى المساحات وأعتقد الونش هو المكلف برقابه شريف لانه أسرع من محمود علاء.

موقف ساسي

🔴 الزمالك هيحاول يحرر ساسى من الرقابه المتوقعه عليه لأنه أول من تبتدى الهجمه من عنده فهو محور أداء الزمالك والقادر على صنع الفارق بلمسه واحده لذلك ممكن جدا يعمل أيضا تبادل أدوار بينه وبين اللاعب رقم ١٠ سواء اوباما او زيزو أو ياخد طرف من الأطراف للهروب من رقابه ديانج او السولية.

الحالة الهجومية

🔴 فى الحالة الهجومية الزمالك معندوش ميزه التحركات بدون كرة مثل لاعبى الأهلى وعندهم ميزة اللعب من الثبات وده راجع لإحساسهم بأنهم مهاريا على مستوى عالى خصوصا بن شرقى وشيكابالا فهيحاولوا دايما يجمعوا اللعب فى مكان معين فى الملعب عشان يستدرجوا لاعبى الأهلى وفجأه هتلاقى الكرة الطوليه من أى لاعب لبن شرقى أو شيكابالا عشان يستخدم الحل الفردى ويعدى.

كارتيرون

🔴 كارتيرون أكيد ذاكر الأهلى جيدا وعارف أن نقطه ضعف الأهلى الحاليه هى الكرات العرضيه و ٩٠% من الأهداف التى سجلت فى الأهلى من كرات عرضيه سواء ثابته أو متحركه لذلك أعتقد هيحاولوا دايما ياخدوا أخطاء من أماكن مؤثرة ويستغلوا أن عندهم أكثر من لاعب بيجيد ضربات الرأس زى ساسى وعلاء والونش وبن شرقى واوباما.

موسيمانى

🙏 إن شاء الله يكون موسيمانى قدر يصحح الأخطاء الدفاعية اللى عندنا ولو أن الوقت ضيق جدا ويكون قدر يتوقع ويقرأ كيف يفكر كارتيرون فى إدارة المباراة ويقدر يقفل على مفاتيح لعب الزمالك خصوصا ال ٣ محاور ساسى وبن شرقى وشيكابالا عشان يعمل عزل وفجوة بينهم وبين المهاجم خصوصا إن موسيمانى مميز فى إدارة المباريات الكبيرة . فكل التوفيق للنادى الأهلى بالفوز يارب🤲